أعذريني يالثواني

أعذريني يالثواني
أدري فيك معي تعبت
ياما صبرت وقلت
بكره يفرجها الكريم
صدقيني يالثواني
راح الكثير ومابقى
الا ثواني وثواني
وبعدها لليل ثواني
وصدقيني بعدها
تشرق على دنيانا شمس
وينقشع عنا الظلام
وندفى من بعد الشتا
وبعدها تمري علينا
أسرع من لمح البصر
ووقتها نترجاك حنا
على هونك يالثواني
أرجوك لاتستعجلين
نبي نعيش العمر كله
وكل وقت نستغله
نبي نملا عيوننا
بشوف مين أنتظرناه
نبي نهدي دموعنا
للي بالأمس بكيناه
أعذريني يالثواني
أدري اني حيل ظلمتك
انت انت مثل ماانت
أبد ماراح تتغيرين
بس الظروف ومشاعرنا
توهمنا انك ثقيلة
لاصرنا بعاد عن اللي نحب
واذا التقينا وفرحنا
نتوهم انك تسرعين
وانك حتى ماتتركينا
بالوقت نسعد مع اللي نحب
صدقيني يالثواني
راح الكثير ومابقى
الا ثواني وثواني
وبعدها لليل ثواني
وبعدها أوعدك اني
أحب أجزاءك وأحبك
وبعدها حتى العقارب
يمكن أسميها مباضع
أسمع بها نبض اللي أحب
مع مرورك يالثواني .