أذكر آخر مره أكتشف شي للمرة الاولى
كان ركوب القطار كان عمري يمكن 16 كان شعوري ما ينوصف وكنت متحمسه جدا
بس المشكله أني ما اتحمست الا قبل الرحله بيوم والي ذكرني اني لازم اتحمس
سائق التاكسي الي ركبنا معاه باليوم الي من بكره كنت بركب القطار لأني سألته
كم تبعد مدينه فينسيا عن روما بالقطار ؟ قالي كم الوقت بعدين سألني هل هي
رحلتك الاولى بالقطار قلت ايه قال بتكون رحلة متميزه .
تذكرت وقتها أني بجرب او بكتشف شي للمرة الاولى و كان شعور رائع و لسه
محتفظه برسومات رسمتها ل سيده كبيره بالسن وجنبها حفيدتها عشان أتذكر
الوجهين الي كانوا بوجهي طوال الرحله .
أذكر مره كنت راجعه من جده للرياض وكانت جنبي بنت توها متزوجه وبتروح تعيش
بالرياض و كمان هاذي أول مره تركب الطياره يالله كيف بغيت أحسدها بترصد
احساس اول مره تركب الطياره .
انا بصراحه نسيت كيف كان شعوري اول مره اركب الطياره لأني ركبتها اول مره وانا
عمري شهر واستمر هذا الشي الي عمري الحين فما اتذكر ابدا كيف كان شعوري
لكن البنت الي كانت جنبي كانت تسألني كيف بتطير الطياره كيف الاحساس يخوف
كيف وكيف وكيف قلت لها مهما شرحت ماراح تفهمين كلها دقايق ونقلع .
شعور تجربة شي للمرة الأولى
بس المشكله ان الانسان بكثير من الاحيان ينسى كيف يرصد احساسه بتجربة الشي
للمره الاولى وكانه شي مفروغ منه ولا يستاهل لحظات من التأمل .
الحياة صاخبه جدا لدرجه تنسينا هذه الاشياء الجانبيه الي ممكن تهم ناس معينين
يحبون العزله والتفكير العميق لكنها صدقوني مو حصر لهم .
أذكر قريبتي الي ساكنه خارج المملكه أغلب حياتها كانت توصف لي كيف لما شافت
الكعبه للمره الاولى وكيف أنها فمهت جمله (( مافي أي كلام ممكن يوصف شعوري)).
نقاط خارج الموضوع الاساسي دائما اتساءل
كيف كان شعور أديسون لما أكتشف الكهرباء هل كان شعوره عادي لأنه هذا الاختراع
كان يفكر ويعمل فيه من سنين وكان شي مفروغ منه انه بيوصل لنتيجه ما بيوم من
الايام ؟.
كيف كان شعور الطيار الي أسقط القنابل النوويه على هيروشيما مع أنه شي مروع
لكن كيف كان شعوره هل كان زي شعور أي احد مكلف بعمل ما او انه شعوره ما ينوصف
وعلى فكره هذا الطيار انتحر ؟.
كيف كان شعور أول رجل مشى على القمر كيف كان احساسه و هو يمشي على
القمر ؟ القمر الي كان لكل الناس وياما نور ليالي وياما كان محور حديث حبيبين او
مصدر وحي لكاتب او كان بدرا تلك اليله عشان يرسمه رسام ما .
في أشياء كثير أكيد ما جربناها
بس الاهم أننا نتوقف ونتذكر أننا في صدد تجربه شي للمره الاولى .
والله متعه
هي صحيح متعه مؤقته وممكن تنتهي بسرعه لكنك بتذكرها بيوم وبتبتسم ويمكن
تستفيد منها بيوم من الايام حلو أن يكون للواحد مخزون من التجارب والذكريات ومهما
كانت التجربه صغير ه وتافهه نبقى شي مميز وبتجربه للمره الاولى .
كنت بنسى أني الحين قاعده أجرب شي للمرة الاولى
وهو أني بنشر موضوع بهذا القسم .
متى آخر مره جربت شي للمرة الاولى ؟؟؟.
—*—
graceful.woman