صورتك وعيوني.

مقدمة : محاولة لرسم ابتسامة على شفاهكم …
دعابة اقبلوها من أخ و ابتسموا إن كانت تستحق .
الإهداء : … و إلى كل من يكره المواضيع الجادة .
—*—
البارحة نمت …
و صورتك بعيوني ما نامت …
صحيت من نومي …
و صورتك في عيوني ما زالت …
توضيت … صليت …
و قلت :
يا لله … الأمور هانت …
أفطرت … لبست … كشخت … تعطرت …
هـــاه … صورتك راحت …
لا … لا …
لا تصدقين … والله ما راحت …
من البيت طلعت …
شغلت موتري … مشيت دربي …
و أشوف الدروب طالت …
و صورتك معي ما زالت …
وبكل اشارات المرور كانت …
وبكل لوحات الأعلانات
صدقيني عيني لها شافت …
و صلت …
دخلت مكتبي …
شربت كاس شاي …
دخنت سيجارة …
حبيت أدخن الثانية …
اوووه … المحاضرة حانت …
جمعت أوراقي …
شلت شنطتي …
دورت القاعة …
عاد هالقاعه ما اواطنها أنا …
ياما لقيت من اللي فيها هم وعنا …
يا ما شفتهم بالشوارع يفحطون …
طول الليل على أجهزتهم يسهرون …
وبالقاعة عندي على الطاوله ينامون …
وبالاختبار والله ما يحلون …
و مهما شرحت لهم ما يفهمون …
(المهم … نرجع لموضوعنا)
بعد دوران فترة …
القاعة … بالأخير بانت …
دخلت … سلمت … حضّرت …
هــــاه … اشوى …
صورتك من عيني غابت …
وش موضوع الدرس ؟؟ ……
إيه … إيه تذكرت …
بديت أشرح …
فيه طالب مزعج …
يا أستاذ ماني فاهم …
و الله النشبه …
بصراحة نفسي عليه شانت …
طنشته … ولكن …
بوسط المحاضرة …
و على السبورة …
فجأة … صورتك طافت …
ارتجفت … و انعفست …
حتى غترتي طاحت …
ضحك … همس …
حتى النايم منهم ضحكته …
مثل صوت البعير كانت …
و من آخر القاعة واحد ملقوف يقول :
معليش يا أستاذ … يا ما … صارت …
ملقوف ثاني شال غترتي …
يا أستاذ تفضل …
خطفت غترتي … لملمت أوراقي …
وبنفسي قلت لنفسي : …
والله و ما قالت …
خرجت من القاعة … وحالتي حاله …
والمشكلة حبك بقلبي … يربط حباله …
رجعت البيت …
غيرت ملابسي …
الوالدة تصوت … تعال …
السفرة زانت …
أووووووه ذكرتني … عصافير بطني جاعت …
غسلت يدي … وجيت …
يا سلام … كبسه …
عاد كبسة أمي …
مثلها نفسي ما ذاقت …
المهم صورتك …
صدقيني بالصحن …
بدل راس الدجاجة كانت …
سميت … حبيت آكل …
فجأة الوالدة قالت : …
يا ( الفيصل ) دريت ؟؟؟
قلت : لا والله …
عيوني للأخبار ما شافت …
قالت : يا الخبل …
( هيا ) عروسٍ صارت …
مين ( هيا ) ؟ …
لا يكون أسمٍ على أسمٍ تشابه …
قالت : لا …
( هيا ) بنت آل ( ……. ) منك طارت …
بغيت ابطل غداء …
بس خفافيش بطني ما طاعت …
تصدقين …
كملت أكلي …
و قلت : طارت … طارت …
وش يعني ؟؟؟ … و الله لو هي حمامه …
(ضحكت بنفسي على نفسي)
😃😄😅 …
عقب ما شبعت …
بالصالة تمددت …
و لبراد الشاهي قربت …
بيالة شاي … وسيجارة …
فكرت … وش يعني طارت ؟؟؟
عقب هالحب …
و القصايد اللي شابت …
عقب هالصور …
اللي دوختني و داخت …
عقب ها لفضايح …
و الغترة اللي عند الطلاب طاحت …
البنت راحت ؟؟؟!!! …
راحت … طارت … عروسٍ صارت …
يا كثر الكلام والمعنى واحد …
و جلست أفكر ؟؟؟؟
و الافكار واجد …
و الذكريات بخاطري جاشت …
و الدموع لعيوني زارت …
آآآآآآ ه ه ه ه
والله الشغلة أشوفها زادت …
وادري أن صورتك …
من خيالي ما ماتت …
و ادري إني بنام كل ليلة …
وصورتي بعيوني ما نامت …
و اعرف أكيد …
إني بأصحى كل صبح …
و صورتك بعيوني ما زالت.
–*–
واحد من الناس